Azərbaycanın voleybol millisi İslamiadadakı rəqibi ilə yoxlama oyunu keçirəcək

Kişi voleybolçulardan ibarət Azərbaycan millisi Avropa çempionatının təsnifat mərhələsinə və İslam Həmrəyliyi Oyunlarına hazırlığı Bakıda davam etdirir.

Federasiyanın Mətbuat Xidmətindən "Report"a verilən məlumata görə, hazırlıq planına uyğun olaraq yığma paytaxtdakı təlim-məşq toplanışında bir neçə yoxlama görüşü keçirəcək.

Pərviz Səmədovun baş məşqçi olduğu komanda İslamiadadakı rəqibi Mərakeş ilə, həmçinin Belarus yığması ilə üz-üzə gələcək.

Hər iki komanda artıq Bakıdadır və bu gün Voleybol Mərkəzində ilk məşqlərinə çıxıblar.

Azərbaycan yığması iyulun 18-də və 21-də Belarusla, iyulun 19-da və 22-də Mərakeşlə üz-üzə gələcək. Qarşılaşmalar saat 17:00-da start götürəcək.