Azərbaycanlı zəvvarların sonuncu iki qrupu bu gün Vətənə dönəcək

Bakı. 15 sentyabr. REPORT.AZ/ Həcc ziyarəti üçün Səudiyyə Ərəbistanına gedən azərbaycanlı zəvvarların sonuncu iki qrupu bu gün Vətənə dönəcək.

Bu barədə "Report"a Qafqaz Müsəlmanları İdarəsindən (QMİ) məlumat verilib.

Həcc ziyarətinə gedən zəvvarlardan 360 nəfəri hazırda Səudiyyə Ərəbistanın Mədinə şəhərindədir: "Bu gün zəvvarları gətirəcək son iki təyyarə reysi həyata keçiriləcək. Gecikmə olmazsa, təyyarələrdən biri Bakı vaxtı ilə 13:10, digəri isə 15:10-da yola çıxacaq. Gələnlərin, yüklərin çox olmasını nəzərə alsaq, gecikmələrin olması normal haldır".

Qeyd edək ki, bu il Azərbaycandan Həcc ziyarətinə 900 zəvvar gedib. Onların Azərbaycana qayıtması prosesinə sentyabrın 12-dən başlanılıb.