Nigeriyada qayıq batıb, 13 nəfər ölüb, 20-dən çox insan itkin düşüb

Nigeriyanın Zamfara ştatında silahlı hücumdan qaçarkən azı 13 nəfər həlak olub və 20-dən çox insan itkin düşüb.

Bu barədə "Report" "Reuters"ə istinadən xəbər verir.

Yerli sakinlər bildirirlər ki, hücum edənlər Birnin Maqaci bölgəsində iki yaşayış məntəqəsinə hücum edib və yerli sakinləri yaxınlıqdakı çaya qaçmağa məcbur ediblər, orada isə cəmi bir qayıq olub. Qayığa minən sakinlər çayda batıblar.

"Reuters" qeyd edir ki, Zamfara silahlı quldurların daimi hücum etdiyi yerdir. Son aylarda hücumların sayı xeyli artıb.