Bu ilin payızında “Böyük-7”liyin DİN başçılarının görüşü olacaq

Bakı. 15 avqust. REPORT.AZ/ Bu ilin payızında İtaliyada “Böyük-7”liyə (“G7”) daxil olan dövlətlərin daxili işlər nazirlərinin təhlükəsizlik məsələlərinə həsr edilən görüşü olacaq.

“Report” “Associated Press”ə istinadən xəbər verir ki, bunu İtaliyanın daxili işlər naziri Marko Minniti avqustun 15-də keçirdiyi mətbuat konfransında bildirib.

Onun sözlərinə görə, tədbir “G7”dəki tərəfdarların - ABŞ, Almaniya, Britaniya, Fransa, Kanada və Yaponiyanın istəyi əsasında təşkil edilir.

Məlumata görə, “Böyük 7”liyin zirvə toplantısının isə bu ilin oktyabrında keçiriləcəyi ehtimal olunur.

Qeyd edək ki, bu ilin mayında İtaliyada keçirilən sammitdə dövlət başçıları terrora qarşı mübarizəyə dair qətnamə imzalayıblar.