Omar Dyedu: Seneqal idmanı şəhər dayanıqlılığının elementi kimi tanımağa çağırır

İdman şəhər dayanıqlılığının əsas komponentlərindən biri kimi rəsmən tanınmalı və səhiyyə, təhsil və iqlimə uyğunlaşma sahələrində dövlət siyasətinə inteqrasiya edilməlidir.

"Report" xəbər verir ki, bu barədə Seneqalın Şəhərsalma, Yerli Hakimiyyət Orqanları və Ərazi İnkişafı Nazirliyinin nümayəndəsi Seku Omar Dyedu Bakıda WUF13-dəki panel müzakirəsi zamanı bildirib.

Onun sözlərinə görə, idman infrastrukturunun qiymətləndirilməsinə dair mövcud yanaşmalar artıq onun şəhər həyatının keyfiyyətinə olan real təsirini əks etdirmir.

"Bu gün şəhərlər tez-tez stadionların və tikilmiş obyektlərin sayını ölçür, lakin bu, kifayət deyil. Biz ən yaxın idman məkanına çatma vaxtını, idmanla məşğul olma tezliyini, qızların və qadınların iştirakını, eləcə də bu məkanların əlilliyi olan şəxslər üçün əlçatanlığını ölçməliyik", - Dyedu qeyd edib.

O vurğulayıb ki, idmana ikinci dərəcəli bir sahə kimi deyil, şəhərlərin dayanıqlı inkişafının tamhüquqlu elementi kimi baxmaq lazımdır.

"İdmanı şəhər dayanıqlılığının komponentlərindən biri kimi rəsmən tanımaq lazımdır", - Seneqal nümayəndəsi deyib.