EIB: İnzibati prosedurların sadələşdirilməsi mənzil böhranının həllini sürətləndirəcək

Həddindən artıq bürokratiya və köhnəlmiş normalar Avropada əlçatan mənzilin inkişafı yolundakı əsas maneələrdən biri olaraq qalır və dərhal yenidən nəzərdən keçirilməlidir.

"Report" xəbər verir ki, bunu Avropa İnvestisiya Bankının (EIB) mənzil, şəhərlər və regionlar şöbəsinin rəhbəri Luis Ebrero Rodriges Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Qlobal mənzil maliyyələşdirilməsindən əlçatan mənzil üzrə yerli fəaliyyətə: qlobal inkişaf maliyyələşdirməsindən və submilli maliyyələşdirmədən istifadə" mövzusunda panel müzakirəsində bəyan edib.

"Mənzil sahəsində inzibati maneələrin azaldılmasına çağırıram. Ümumavropa mənzil planı əsasən sektorun inkişafında əsas məhdudlaşdırıcı amillərdən biri olan bürokratik yükün azaldılmasına yönəlib. Bir çox ölkələrdə layihələrin səmərəli şəkildə həyata keçirilməsi üçün mənzil təminatı sahəsində normativ-hüquqi baza yenidən nəzərdən keçirilməlidir", - o bəyan edib.

L.Rodrigesin sözlərinə görə, mürəkkəb razılaşdırma prosedurları, icazələrin verilməsinin uzun vaxt aparması və parçalanmış tənzimləmə mənzil layihələrinin həyata keçirilməsini əhəmiyyətli dərəcədə ləngidir və onların dəyərini artırır. Nəticədə əlçatan mənzil xüsusilə tələbin sürətli artımı ilə üzləşən böyük şəhərlərdə əhali üçün daha az əlçatan olur.

O qeyd edib ki, mənzil böhranının aradan qaldırılması üçün beynəlxalq maliyyə institutları, milli hökumətlər və bələdiyyələr arasında daha sıx koordinasiya lazımdır. Bu zaman təkcə maliyyələşdirmə deyil, həm də çevik və proqnozlaşdırıla bilən tənzimləyici mühitin yaradılması mühüm rol oynayır.

Avropa İnvestisiya Bankının nümayəndəsi vurğulayıb ki, bu gün mənzil siyasəti nəqliyyat, ekologiya, enerji səmərəliliyi və sosial infrastrukturu əhatə edən davamlı şəhər inkişafı ilə bağlı daha geniş strategiyanın bir hissəsi kimi nəzərdən keçirilməlidir.

Onun sözlərinə görə, inzibati prosedurların sadələşdirilməsi layihələrin həyata keçirilməsini sürətləndirməyə, daha çox investisiya cəlb etməyə və mənzil sektorunda beynəlxalq maliyyə resurslarından istifadənin səmərəliliyini artırmağa imkan verəcək.