Azərbaycan BOKT-larının xalis mənfəəti 29 % azalıb

Azərbaycandakı bank olmayan kredit təşkilatları (BOKT) ötən ili 111,5 milyon manat xalis mənfəətlə başa vurub.

"Report" Azərbaycan Mərkəzi Bankına istinadən xəbər verir ki, bu, əvvəlki ilə nisbətən 29 % azdır.

İl ərzində BOKT-ların əməliyyat gəlirləri 474,9 milyon manat (illik müqayisədə 8,35 % çox), əməliyyat xərcləri 242,1 milyon manat (37,5 % çox), xüsusi ehtiyatlara ayırmaları 107 milyon manat (66,4 % çox), gözlənilməz gəlirləri 1,7 milyon manat (2,8 dəfə çox), mənfəət vergisi ödəmələri isə 16 milyon manat (61,5 % az) təşkil edib.

Bu il yanvarın 1-nə BOKT-ların aktivləri 1 milyard 243,6 milyon manat olub ki, bu da 1 il əvvələ nisbətən 25,2 % çoxdur. Bunun 923,1 milyon manatı müştərilərə verilmiş xalis kreditlərdir. Son 1 ildə sektorun kredit portfeli 28,8 % böyüyüb.

Hesabat dövründə BOKT-ların öhdəlikləri 26,5 % artaraq 679,3 milyon manata, balans kapitalı isə 23,6 % artaraq 564,3 milyon manata çatıb.