"Access Bank"ın istiqrazlarına 6 investor maraq göstərib

Bu gün "Bakı Fond Birjası" QSC-də (BFB) "Access Bank” QSC-nin 5 milyon ABŞ dolları dəyərində faizli, təmin edilməmiş, sənədsiz, adlı istiqrazlarının yerləşdirilməsi üzrə hərrac keçirilib.

"Report" BFB-yə istinadən xəbər verir ki, hərraca hər birinin nominal dəyəri 1 000 dollar olan 5 000 ədəd istiqraz çıxarılıb.

Qiymətli kağızlar standart bazar seqmentində, rəqabətli hərrac üsulu ilə investorlara təklif olunub.

İstiqrazlara 6 investor qiyməti 1 000 dollar (5,5%), ümumi məbləği isə 5 milyon dollar olan 6 sifariş təqdim edib. Beləliklə, yerləşdirmə tam baş tutub.

Qiymətli kağızlar 18 ay tədavüldə olacaq. Onların illik gəlirliliyi 5,5 %-dir. Faizlər rüblük ödəniləcək. Prosesin anderrayteri “ABB-İnvest İnvestisiya Şirkəti” QSC, subanderrayteri isə “Unicapital İnvestisiya Şirkəti” ASC-dir.