İmişlidə yol qəzasında xəsarət alanların kimliyi məlum olub - YENİLƏNİB

İmişli rayonunda yol qəzasında xəsarət alanların kimliyi məlum olub.

"Report"un Muğan bürosunun məlumatına görə, onlar 1995-ci il təvəllüdlü Məmmədov Feyruz Rövşən oğlu, 1966-cı il təvəllüdlü Xankişiyev İlyas Musa oğlu və 1960-cı il təvəllüdlü Novruzov Əyyam Sadiq oğludur.

Yaralıların müalicəsi rayon xəstəxanasında davam edir.

Faktla bağlı araşdırmalar davam etdirilir.

12:19

İmişli rayonunda üç nəfərin xəsarət alması ilə nəticələnən yol qəzası baş verib.

"Report"un Muğan bürosunun məlumatına görə, hadisə İmişli rayonunun Qulubəyli kəndi ərazisində qeydə alınıb.

Belə ki, qəza zamanı "Toyota", "Mercedes" və "Hyundai" markalı avtomobillər toqquşub.

Qəza nəticəsində xəsarət alan üç nəfər İmişli Rayon Mərkəzi Xəstəxanasına çatdırılıb.

TƏBİB-dən isə sorğuya cavab olaraq bildirilib ki, bu gün saat 10:30 radələrində İmişli rayonu ərazisində baş verən yol-nəqliyyat hadisəsi səbəbilə üç kişi İmişli Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Məlumata görə, yaralılara bədənin müxtəlif nahiyələrinin travması, sol bud sümüyünün sınığı, sol sirkə kasasının sınığı diaqnozları təyin olunub və zəruri tibbi xidmətlər göstərilib. Vəziyyəti ağır qiymətləndirilən 1995-ci il təvəllüdlü şəxs cərrahi əməliyyata götürülüb, müalicəsi Cərrahiyyə şöbəsində davam etdirilir.

1960-cı və 1966-cı il təvəllüdlü pasiyentlərin müalicəsi Təcili tibbi yardım şöbəsində davam etdirilir. Vəziyyətləri orta ağır qiymətləndirilir.

Faktla bağlı araşdırma aparılır.