"Bayer 04" Kərim Benzema ilə danışıqlar aparması barədə iddiaları təkzib edib

Almaniyanın "Bayer" klubunun idman direktoru Simon Rolfes komandanın fransalı hücumçu Kərim Benzema ilə müqavilə imzalamaq üçün danışıqlar aparması barədə yayılan xəbərləri təkzib edərək heyətin tam formalaşdırıldığını açıqlayıb.

"Report" "Bild" nəşrinə istinadən xəbər verir ki, klub rəsmisi Bundesliqa təmsilçisinin hazırkı heyətindən razı olduğunu qeyd edib.

38 yaşlı forvard Almaniya kollektivinə keçməkdə maraqlı olub və bu barədə hazırda həmin komandada çıxış edən sabiq komanda yoldaşları Mussa Diabi və Lukas Vaskeslə müzakirələr aparıb. Keçidlə bağlı şayiələrin artmasına təcrübəli hücumçunun sosial şəbəkədə rəqib klubun rəsmi hesabını izləməsi də təkan verib.

Fransalı hücumçu 2026-cı ilin avqustunda "Əl-Hilal"ı tərk etsə də, Səudiyyə Ərəbistanı Liqası ilə 2030-cu ilədək səfir müqaviləsi qüvvədə qalır. Həmin razılaşma futbolçunun turnirin tədbirlərində iştirakını tələb edir ki, bu da onun Avropa klubunda çıxış etməsinə mane ola bilər. Oyunçunun nümayəndələri Avropaya qayıdışını reallaşdırmaq üçün sözügedən müqavilənin şərtlərini yumşaltmağa çalışırlar.

Qeyd edək ki, K. Benzema 2025-ci ildən Səudiyyə Ərəbistanı təmsilçisində çıxış edib. O, 2025/2026 mövsümündə keçirdiyi 13 matçda 9 qol vurub və 5 məhsuldar ötürmə verib. "Transfermarkt" portalı Fransa yığmasının sabiq üzvünün dəyərini 5 milyon avro qiymətləndirir.