"Barselona" Denis Suaresin "Arsenal"a transfer olunmasına dair xəbəri saytından çıxarıb

Bakı. 31 yanvar. REPORT.AZ/ İspaniyanın "Barselona" klubunun futbolçusu Denis Suaresin İngiltərə "Arsenal"ına transferi baş tutmaya bilər.

"Report"un məlumatına görə, Kataloniya təmsilçisi ispaniyalı yarımmüdafiəçinin "topçular"a keçidinə dair xəbəri elan etdikdən bir müddət sonra rəsmi saytından çıxarıb. Hər iki klubun transfer xəbərini bu gün elan edəcəkləri gözlənilir.

Daha əvvəl "Arsenal"ın 25 yaşlı oyunçunu sonradan birdəfəlik alına bilməsi şərti ilə mövsümün sonunadək icarəyə götürdüyü açıqlanıb.

Qeyd edək ki, Denis Suares "Barselona"ya 2016-cı ilin yayında "Vilyarreal"dan 3,25 milyon avroya keçib. Bu mövsüm futbolçu La Liqada 2 oyunda cəmi 17 dəqiqə meydanda olub. Onun klubla müqaviləsi 2020-ci ilin yayınadək qüvvədə idi.