Ötən ay Azərbaycanda 3 milyard kubmetrdən çox əmtəəlik qaz hasil edilib

Bu ilin yanvar ayında Azərbaycanda 3 milyard 978,9 milyon kubmetr təbii qaz hasil edilib.

“Report”un Dövlət Statistika Komitəsinə istinadən verdiyi xəbərə görə, bunun 3 milyard 112,2 milyon kubmetri əmtəəlik təbii qazın payına düşüb.

Hesabat dövründə təbii qaz hasilatı illik müqayisədə 6,4 %, əmtəəlik qaz hasilatı isə 4,8 % azalıb.

Ötən ay ərzində Azərbaycanda 2 milyon 308,2 min ton qaz kondensatı daxil olmaqla xam neft hasil edilib. Bunun 2 milyon 301,1 min tonu əmtəəlik xam neftin payına düşüb.

Hesabat dövründə neft hasilatı və əmtəəlik neftin həcmləri 2024-cü ilin yanvar ayının göstəriciləri ilə müqayisədə müvafiq olaraq 6,5 və 6,6 % azdır.