Takaiti Yaponiya tarixində ilk qadın Baş nazir olub - YENİLƏNİB

Yaponiyanın yeni Baş naziri Sanae Takaiti seçilib.

"Report" xəbər verir ki, bu barədə yerli KİV məlumat yayıb.

O, ölkə tarixində hökumətə rəhbərlik edən ilk qadın olub.

Ölkə parlamentinin aşağı palatasının deputatlarının əksəriyyəti onun seçilməsi üçün səs veriblər. Bildirilib ki, ona 465 səsdən 237-si verilib. Bu, ona səsvermənin birinci turunda qələbə qazanmağa imkan verib.

Takaitinin əsas rəqibi - Konstitusiya-Demokratik Partiyanın lideri Yoşihiko Noda 149 səs toplayıb.

05:22

Yaponiyada oktyabrın 21-də parlamentin aşağı palatasında keçiriləcək yeni baş nazir seçkiləri öncəsi Siqeru İsibanın başçılıq etdiyi bütün hökumət istefa verib.

"Report"un xəbərinə görə, bu barədə hökumətin Dəftərxanası məlumat yayıb.

İsiba 386 gün Yaponiyanın Baş naziri vəzifəsində çalışıb.

Bir neçə saatdan sonra parlamentin əsas aşağı palatası növbədənkənar sessiyaya toplanacaq və sessiya zamanı Liberal Demokrat Partiyasının (LDP) yeni sədri Sanae Takaiti Baş nazir seçiləcək. O, Yaponiyanın ilk qadın Baş naziri olacaq. Səsvermədən bir gün əvvəl parlamentdə çoxluğa malik olmayan LDP mühafizəkar Takaitinin seçilməsinə zəmanət verən "Yaponiya Yeniləşmə Cəmiyyəti" Partiyası ilə alyans yaratmağa nail olub.

Bundan sonra Sanae Takaiti gün ərzində yeni hökuməti formalaşdıracaq. Yaponiya mətbuatının yazdığına görə, 2019-2021-ci illərdə bu vəzifədə olan Tosimitsu Moteqinin xarici işlər naziri olacağı gözlənilir. Moteqi LDP seçkilərində Takaitinin rəqiblərindən biri idi.