Trüdo Fələstin Prezidenti ilə telefon danışığında HƏMAS-ın hücumlarını pisləyib

Kanadanın Baş naziri Castin Trüdo Fələstin Prezidenti Mahmud Abbasla telefon danışığında HƏMAS-ın İsrailə hücumunu pisləyib.

“Report” xəbər verir ki, bu barədə kanadalı siyasətçi sosial şəbəkədə bildirib.

“Bu gün Fələstin Administrasiyasının (Fələstin Dövləti – red.) Prezidenti Mahmud Abbasla danışdım. HƏMAS-ın İsrailə hücumunu pislədim, fələstinli və israilli dinc sakinlərin qorunmasının vacibliyini müzakirə etdim və fələstinli dinc sakinlərə humanitar əlçatanlığın təmin edilməsinin zəruriliyini vurğuladım”, - Kanadanın hökumət başçısı qeyd edib.

Xatırladaq ki, Mahmud Abbas Fələstin Dövlətinin birinci prezidenti, həmçinin HƏMAS-ın rəqibi olan FƏTH partiyasının lideridir. Qəzzadakı opponentlərindən fərqli olaraq nisbi dünyəviliyi ilə seçilən Mahmud Abbas və hökuməti İordan çayının qərb sahilinə, HƏMAS isə Qəzza zolağına nəzarət edir.