Somali binaların enerji səmərəliliyinin artırılması üçün dörd prioritet müəyyənləşdirib

Somali yeni binaların enerji səmərəliliyini artırmaq, mövcud infrastrukturu modernləşdirmək, bərpa olunan enerjiini inkişaf etdirmək və səmərəli soyutma həlləri tətbiq etmək niyyətindədir.

"Report" xəbər verir ki, bunu Somalidə tikinti üzrə rəhbər komitənin üzvü, gender məsələləri və iqlim dəyişikliyi üzrə milli əlaqələndirici Ayan Harare Bakıda keçirilən IV İqlim Həftəsində (CW4) bildirib.

Harare ölkənin iqlim şəraiti nəzərə alınmaqla yeni binaların enerji səmərəliliyinə dair minimum tələbləri nəzərdə tutan tikinti norma və standartlarının tətbiqini və onlara riayət olunmasını birinci prioritet adlandırıb.

İkinci istiqamət mövcud və ictimai binaların yenidən qurulması olacaq. Hararenin sözlərinə görə, bu, hərtərəfli dövlət idarəçiliyinin olmadığı 30 ildən artıq müddətdən sonra ölkə üçün prioritet məsələlərdən biridir. O, başlanğıc nöqtəsi kimi dövlət binalarını, məktəbləri və xəstəxanaları qeyd edib.

Üçüncü prioritet elektrikləşdirmə və bərpa olunan enerjinin inkişafıdır. O, Somalinin günəş enerjisi sahəsində böyük potensiala malik olduğunu, lakin etibarlı və əlçatan elektrik enerjisinə çıxışın problem olaraq qaldığını bildirib.

"Dördüncü prioritet soyutmadır. O, temperaturun yüksəlməsi ilə getdikcə daha böyük əhəmiyyət kəsb edəcək. Bizə səmərəli soyutma avadanlığı, daha təkmil bina konstruksiyaları və passiv soyutma həlləri lazımdır", - Harare qeyd edib.

O, həmçinin bildirib ki, Somali milli səviyyədə müəyyən edilmiş töhfə və milli adaptasiya planını həyata keçirir. Eyni zamanda, ölkə tikinti standartlarının işlənib hazırlanması və onlara riayət olunmasının təmin edilməsi üçün potensialını artırmalıdır.