Səudiyyə Ərəbistanının müdafiə naziri Cey Di Venslə görüşüb

Səudiyyə Ərəbistanının müdafiə naziri Xalid bin Salman Vaşinqtonda ABŞ-nin Vitse-prezidenti Cey Di Venslə görüş keçirib.

"Report" CNN-ə istinadən xəbər verir ki, tərəflər İraqda İranla əlaqəli obyektlərə endirilən birgə zərbələrin nəticələrini, Səudiyyə Ərəbistanının infrastrukturunun müdafiəsini və Yaxın Şərqdəki münaqişənin gələcək inkişafını müzakirə ediblər.

Mənbələrin məlumatına görə, Xalid bin Salman həmçinin vəliəhd şahzadə Məhəmməd bin Salmanın şəxsi mesajını Vensə çatdırıb və Ər-Riyadın mövqeyini açıqlayıb. Bu mövqeyə əsasən, Tehran İraqdakı iranyönlü qruplaşmalar və Yəməndəki husilər vasitəsilə təzyiqləri gücləndirməyə davam edəcək.

"Səudiyyə Ərəbistanı hələ də gərginliyin azaldılması tərəfdarıdır və hesab edir ki, münaqişənin uzanması ciddi risklərlə bağlıdır, lakin zərurət yaranarsa, o, çərşənbə axşamı olduğu kimi cavab tədbirləri görəcək", - məlumatda qeyd olunur.