KİV: Kanada Hindistanla ticari danışıqları siqhlərin liderinin qətli ilə bağlı dayandırıb

Kanada sentyabrın əvvəlində Kanada siqh icmasının lideri Hardip Sinqh Nicarın iyun ayında öldürülməsi ilə əlaqədar Hindistanla azad ticarət danışıqlarını dayandırıb. Ottava Hindistan xüsusi xidmət orqanlarının bunda əli ola biləcəyini güman edir.

“Report” xəbər verir ki, bu barədə Kanadan hökumətindəki mənbə “Reuters”ə açıqlayıb.

Agentliyin digər mənbəyi bildirib ki, Kanada ölkənin siqh icmasının liderinin qətli ilə Hindistanın mümkün əlaqəsi üzərində ABŞ ilə sıx əməkdaşlıq edib.

Xatırladaq ki, daha öncə Hindistanın ticarət və sənaye naziri Piyuş Qoyal ölkələr arasında ticarət danışıqlarının dayandırıldığını bildirsə də, bunun konkret səbəblərini açıqlamamışdı.