Şəhid qardaşı: Anam onun həsrəti ilə bu dünyadan köçdü

Birinci Qarabağ müharibəsində itkin düşmüş şəhidin qardaşı anasının onun həsrəti ilə dünyasını dəyişdiyini bildirib.

Bu barədə aprelin 18-də Samux rayonunun Qovlarsarı kəndində dəfn edilən Birinci Qarabağ müharibəsində şəhid olmuş Münasib Mehdiyevin qardaşı Adil Mehdiyev "Report"un Qərb bürosunun əməkdaşı ilə söhbətdə danışıb.

O, illər sonra qardaşının nəşinin dəfn edildiyi məkanın müəyyənləşdiyi üçün sevindiyini deyib:

“Dövlət başçısına və bu işdə əziyyəti keçən hər kəsə təşəkkür edirəm, 33 il sonra qardaşımın taleyi məlum oldu, gözlərimiz yollardan çəkildi.

Anam qardaşımın yolunu gözləyə-gözləyə, onun həsrəti ilə dünyasını dəyişdi. İndi onlar qovuşublar. Allah bütün şəhidlərimizə rəhmət eləsin”.