İşğal dövründə Azərbaycanın dini və mədəni irsi ağır dağıntılara məruz qalıb - RƏY

Ermənistanın işğalı dövründə Azərbaycanın şəhər və kəndləri ilə yanaşı, dini və mədəni irsi də məhv edilib.

Bunu "Report"a açıqlamasında Milli Məclisin deputatı Fatma Yıldırım deyib.

O bildirib ki, işğal altında qalmış ərazilərimizdə mövcud olan 67 məsciddən 65-nin dağıdılması, təhqir edilməsi və yararsız vəziyyətə salınması təkcə xalqımıza qarşı deyil, İslam mədəni irsinə qarşı da hörmətsizliyin açıq təzahürü idi:

"Məscidlərin dağıdılması, tarixi və dini abidələrin məhv edilməsi həmin ərazilərdə həyata keçirilən vandalizm siyasətinin acı nəticələrindən biri kimi tarixdə qalacaq".

"Dövlətimizin diqqət və qayğısı ilə məscidlər, ziyarətgahlar, tarixi-mədəni abidələr bərpa olunur, illərlə susdurulmuş məkanlara yenidən həyat qayıdır. Qarabağda aparılan bərpa işləri sübut edir ki, Azərbaycan yalnız şəhər və kəndləri yenidən qurmur, eyni zamanda öz tarixi-mədəni irsini, mənəvi dəyərlərini və milli kimliyini də bərpa edir. Bu gün azad edilmiş torpaqlarımızda yüksələn hər bir məscid və bərpa olunan hər bir abidə dövlətimizin gücünün, xalqımızın iradəsinin və tarixi ədalətin təntənəsinin rəmzidir".