Naxçıvanda xarici ticarətlə məşğul olan sahibkarlarla görüş keçirilib

Bakı. 15 aprel. REPORT.AZ/ Gömrük xidməti və biznes subyektləri arasında əməkdaşlığın genişləndirilməsi məqsədilə Naxçıvan Biznes Mərkəzində xarici iqtisadi fəaliyyət iştirakçıları ilə növbəti görüş olub. 

Bu barədə “Report”a Dövlət Gömrük Komitəsindən (DGK) bildirilib.

Məlumata görə, görüşdə gömrük orqanları tərəfindən xarici ticarətin asanlaşdırılması və daxili bazarın qorunması istiqamətində görülən işlər, gömrük ödənişləri zamanı sahibkarlara tətbiq olunan güzəştlər, göstərilən elektron gömrük xidmətləri haqqında məlumat verilib.

Əlaqəli dövlət orqanlarının qarşılıqlı fəaliyyətinin də dəyərləndirildiyi tədbirdə iş adamlarının problemləri dinlənilərək həlli yolları müzakirə olunub.

Naxçıvan MR-nın DGK-sının sədri Asəf Məmmədov gömrük sistemində qanunvericiliyin təkmilləşdirilməsinin, "bir pəncərə" prinsipinin tətbiqinin, xidmətlərin elektron qaydada həyata keçirilməsinin rəsmiləşdirməni asanlaşdırmaqla yanaşı, həm də sürətləndirdiyini önə çəkib.

Tədbirdə, gömrük rəsmiləşdirilməsinin aparılması üçün biznes subyektləri tərəfindən müəyyən şəxslərin ayrılması təklif olunub və bunun ümumi işin səmərəliliyinə müsbət təsir edəcəyi vurğulanıb.

Daha sonra Naxçıvan MR-nın iqtisadiyyat naziri Famil Seyidov çıxış edib.

Naxçıvan MR Standartlaşdırma, Metrologiya və Patent üzrə Dövlət Komitəsinin sədri Bəxtiyar İsmayılov yerli istehsalın, o cümlədən xarici ölkələrdən idxal olunan ərzaq və qida məhsullarının, mal-material və avadanlıqların keyfiyyət göstəricilərinə ciddi nəzarət olunduğunu vurğulayaraq, muxtar respublikada rəqabətədavamlı məhsul istehsalına xüsusi önəm verildiyini qeyd edib.

Sonra Naxçıvan MR DGK-sının sədr müavini Səhət Həbibbəyli gömrük orqanları tərəfindən sahibkarlıq sahələrinin inkişafının stimullaşdırılması, daxili bazarın qorunması, süni qiymət dəyişmələrinin qarşısının alınması istiqamətində görülən işlərdən danışıb.

Komitənin maliyyə-tarif şöbəsinin rəisi Rafael Əliyev gömrük rüsumlarının hesablanması qaydası və sahibkarlara tətbiq olunan güzəştlər, statistika və informasiya texnologiyaları şöbəsinin rəisi Emin Eylazov isə elektron gömrük xidmətləri barədə məlumat verib.

Naxçıvan MR-nın Sahibkarlar Konfederasiyasının sədri Vüqar Abbasov xarici iqtisadi fəaliyyətlə məşğul olan sahibkarlıq subyektlərinin dəstəklənməsi məqsədilə əlaqəli dövlət qurumları tərəfindən görülən işlərin həcminin artırılması, sahibkarlıq fəaliyyətinin düzgün istiqamətləndirilməsi ilə bağlı təkliflərlə çı­xış edib və bu cür görüşlərin əhəmiyyətini qeyd edib.

Daha sonra xarici iqtisadi fəaliyyətlə məşğul olan sahibkarlıq subyektlərinin iştirakı ilə diskussiya olub. Aidiyyəti dövlət qurumları xarici iqtisadi fəaliyyət iştirakçıları tərəfindən qaldırılan məsələlərin həlli yollarını birgə müzakirə ediblər. Bir çox məsələlər yerindəcə həll olunub.

Xarici iqtisadi fəaliyyət iştirakçılarına gömrük rəsmiləşdirilməsi zamanı tələb olunan sənədlər və gömrük-biznes əməkdaşlığının artırılması istiqamətində əsas tövsiyələri özündə əks etdirən məlumat vərəqələri paylanılıb.