Gürcüstanın xarici ticarət dövriyyəsi artıb

Bu ilin yanvar-sentyabr aylarında Gürcüstanın xarici ticarət dövriyyəsi 9 mlrd. 193,7 mln. dollar təşkil edib.

“Report”un yerli bürosu xəbər verir ki, bu barədə ölkənin Milli Statistika İdarəsinin hesabatında bildirilib.

İllik müqayisədə qonşu ölkənin xarici ticarət dövriyyəsində 0,5% artım qeydə alınıb.

Bu ilin ilk doqquz ayında Gürcüstanın ixracı illik müqayisədə 11,1% artaraq 2 mlrd. 719,2 mln. dollar, idxalı isə 3,3% azalaraq 6 mlrd. 474,5 mln. dollara bərabər olub.

Hesabat dövründə ticarət kəsiri 3 mlrd. 755,3 mln. dollar olub ki, bunun da ümumi ticarət dövriyyəsindəki payı 40,8% təşkil edib.