Gömrük yük maşınında heroinin keçirilməsinin qarşısını alıb - VİDEO

Baş Gömrük İdarəsi Əməliyyat və Təhqiqat İdarəsinin Əməliyyat şöbəsinə külli miqdarda narkotik vasitə və psixotrop maddələrin qaçaqmalçılıq yolu ilə İrandan Azərbaycana gətiriləcəyi barədə məlumat daxil olub.

Bu barədə “Report”a Dövlət Gömrük Komitəsindən məlumat verilib.

Bildirilib ki, həmin əməliyyat məlumatı əsasında, Cənub Ərazi Baş Gömrük İdarəsinin "Biləsuvar" gömrük postunda İran ərazisindən tranzit keçməklə gələn Azərbaycan vətəndaşı Dünyamalıyev İlkin Yusif oğlunun idarə etdiyi MAN markalı, “99-JZ-401”/”10-ZJ-401” dövlət qeydiyyat nişanlı yük avtomobili saxlanılıb.

Şifahi sorğu-sual zamanı sürücü üzərində və idarə etdiyi nəqliyyat vasitəsində gömrük nəzarətindən gizlədilən və ya gömrük nəzarətinə bəyan edilməli hər hansı predmetin olmadığını bildirib.

Lakin kinoloji xidmət itinin tətbiqi ilə keçirilən baxış zamanı xidməti it avtomobilin kabinə və qoşqusunun ətraflarına reaksiya verib. Nəqliyyat vasitəsi əsaslı yoxlanılarkən kabinədə "elektrik açarı"nın altındakı boşluqda 1 ədəd sellofan bükümdə, qablaşdırılması ilə birlikdə çəkisi 3 qram təşkil edən narkotik vasitə - qurudulmuş marixuana aşkar edilib.

Daha sonra yük avtomobilinin qoşqusu yoxlanılıb. Bu zaman isə qoşquda olan paletlərə yığılmış "alçipan" yükünün ön hissəsində - paletlər ilə qoşqunun ön divarı arasındakı boşluqda 7 ədəd müxtəlif ölçülü bağlamalar aşkar olunub.

Belə ki, həmin bağlamalara baxış nəticəsində ümumi çəkisi 8 kiloqram 557 qram təşkil edən narkotik vasitə - heroin və ümumi çəkisi 3 kiloqram 241 qram təşkil edən psixotrop maddə- metamfetamin aşkara çıxarılıb.

Xatırladaq ki, metamfetamin "Azərbaycan Respublikasının ərazisində dövriyyəsi qadağan edilən psixotrop maddələrin I Siyahısı"na daxildir.

Faktla bağlı araşdırma aparılır.

Gömrük yük maşınında heroinin keçirilməsinin qarşısını alıb - VİDEO