Azərbaycanın metal məmulatları istehsalçısı yeni səhmdar cəlb edib

"AzeSteelCompany” ASC-nin səhmlərinin müvafiq olaraq 73 %-nə və 10 %-nə nəzarət edən Cəmaləddin İsmayılov və Ömər Hüseynov paylarını azaldıblar.

"Report" xəbər verir ki, birinci payını 19,8 %-ə, ikinci isə 3,3 %-ə endirib.

Əvəzində səhmlərin 10 %-nə nəzarət edən "Azfinance İnvestisiya Şirkəti" QSC payını 65,1 %-ə çatdırıb, həmçinin şirkətə cəlb olunmuş yeni səhmdar - Aysel Səfərəliyeva 4,8 % pay əldə edib.

Səhmlərin qalan 7 %-i isə əvvəlki kimi Kənan Ağayeva məxsusdur.

Xatırladaq ki, “AzeSteelCompany” 2003-cü ildə "Ekspress-C" adı ilə yaradılıb, 2022-ci ildə rebrendinq edib. Onun nizamnamə kapitalı 8,355 milyon manatdır. Səhmdar cəmiyyəti metal məmulatlarının istehsalı ilə məşğuldur.

"Azfinance İnvestisiya Şirkəti"nə gəlincə isə, o həm də “Optimal Finance” MMC bank olmayan kredit təşkilatının (BOKT) təsis paylarının 70 %-nə nəzarət edir. İnvestisiya şirkətinin İdarə Heyətinin sədri İntiqam Səfərəliyevdir.