Şlapaçenko: BMT Qarabağda Azərbaycan hökuməti ilə strateji dialoq keçirəcək

BMT Azərbaycanın Qarabağ bölgəsində ölkə hökuməti ilə strateji dialoq keçirməyi planlaşdırır.

"Report" xəbər verir ki, bunu jurnalistlərə BMT-nin Azərbaycandakı rezident-əlaqələndiricisi Dmitri Şlapaçenko bildirib.

"Biz hökumətlə birlikdə Qarabağda strateji dialoq keçirməyi planlaşdırırıq. Mənim üçün bu, strateji əhəmiyyət kəsb edir və çox vacib bir istiqamətdir", - o vurğulayıb.

D.Şlapaçenko qeyd edib ki, bu dialoq çərçivəsində hökumətin ehtiyacları müəyyən ediləcək və BMT-nin Qarabağda həyata keçirilən proseslərə hansı formada dəstək göstərə biləcəyi aydınlaşdırılacaq.

O, həmçinin bir sıra mədəni tədbirlərin keçirilməsi və BMT-nin Azərbaycandakı fəaliyyətinin genişləndirilməsi planları barədə məlumat verib.

"Biz bunun üçün bütün zəruri şərtləri görürük", - o deyib.

D.Şlapaçenko, həmçinin Azərbaycanın Dayanıqlı İnkişaf Məqsədlərinin təşviqinə olan sadiqliyini qeyd edib: "Biz ölkənin Dayanıqlı İnkişaf Məqsədlərinin təşviqində liderlərdən biri olmasından həqiqətən təsirlənmişik. Nə etmək lazım olduğuna dair Azərbaycanın artıq öz baxışı var".

O vurğulayıb ki, Azərbaycan Dayanıqlı İnkişaf Məqsədlərinin reallaşdırılması çərçivəsində artıq dörd könüllü milli icmal təqdim etmiş azsaylı ölkələrdən biridir. D.Şlapaçenkonun sözlərinə görə, hazırda beşinci icmal hazırlanır.