Norliza Haşim: Malayziya DİM11 üzrə milli yol xəritəsi hazırlayıb

Malayziya Yeni Şəhər Gündəliyini ardıcıl olaraq həyata keçirməyə davam edir və regional platformaları onun icrasının sürətləndirilməsi üçün əsas alət hesab edir.

"Report" xəbər verir ki, bunu URBANICE Malaysia-nın baş icraçı direktoru Norliza Haşim (Norliza Hashim) Bakıda keçirilən WUF13 çərçivəsində Asiya-Sakit Okean Regionunun Şəhər Gündəliyi Platformasından (AP-UAP) istifadə edilməklə təlim tədbirində bəyan edib.

Onun sözlərinə görə, Malayziya 2016-cı ildən Yeni Şəhər Gündəliyinin həyata keçirilməsinə sadiq qalır və artıq onun icrası üzrə iki milli hesabat təqdim edib. O qeyd edib ki, ölkə Dayanıqlı İnkişaf Məqsədi 11 üzrə milli yol xəritəsi hazırlayıb, həmçinin təxminən 94 könüllü yerli icmal hazırlayıb.

"AP-UAP platforması Malayziyanın təkcə daxili inkişafa deyil, həm də Asiya-Sakit Okean regionunda əməkdaşlığın gücləndirilməsinə yönəlmiş milli və regional öhdəliklərinin bir hissəsidir", - o deyib.

O, həmçinin xatırladıb ki, 2024–2027-ci illərdə Malayziya UN-Habitat Assambleyasına sədrlik edir, bundan sonra isə onu Birləşmiş Ərəb Əmirliklərinə (BƏƏ) təhvil verəcək və bu, birgə təşəbbüslərin təşviqi üçün əlavə imkanlar açır.

N.Haşimin sözlərinə görə, platforma hər iki sədrlik üçün ümumi proqram əsası ola bilər, eləcə də digər regionlardakı bənzər təşəbbüslərlə, o cümlədən Mərakeş tərəfindən irəli sürülmüş Afrika Şəhər Gündəliyi Platforması ilə sinxronlaşdırmanı dəstəkləyə bilər.

O qeyd edib ki, Yeni Şəhər Gündəliyinin icrasının sürətləndirilməsi, yanaşmaları vahidləşdirməyə və regionlar arasında təcrübə mübadiləsi aparmağa imkan verən regional metodoloji platformalardan daha geniş istifadə edilməsi hesabına mümkündür.