Braziliyanın WUF13-dəki nümayəndəsi: Ölkəmizdə mənzil böhranı iri şəhərlərdə kəskin hiss olunur

Braziliyada mənzil böhranı aydın ifadə olunmuş metropoliten ölçüsünə malikdir, çünki məhz iri şəhər aqlomerasiyalarında mənzil qıtlığı, qeyri-rəsmi yaşayış məskənləri və xaotik şəhər genişlənməsi müşahidə olunur.

"Report" xəbər verir ki, bu barədə Braziliya Şəhərlər Nazirliyinin şəhər inkişafı üzrə direktoru Kristiana Skorza Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən tədbirdə bildirib.

Onun sözlərinə görə, belə bir vəziyyət ərazi bərabərsizliyini gücləndirir və infrastruktura, nəqliyyat sistemlərinə və dövlət xidmətlərinə əlavə yük yaradır.

"Dövlət siyasətinin koordinasiyasının olmaması əhalinin mənzilə, xidmətlərə və şəhərlərin təqdim etdiyi imkanlara çıxışını çətinləşdirir. Braziliya kontekstində bu mənzil böhranını necə aradan qaldırmaq olar? Cavab qaçılmaz olaraq qeyri-rəsmi şəhərin metropoliten dinamikanın ayrılmaz hissəsi kimi tanınması ilə bağlıdır. Bu ərazilər milyonlarla insanın evidir və urbanizasiya, torpaq leqallaşdırılması, infrastrukturun inkişafı, şəhər mobilliyi və iqlim adaptasiyasına yönəlmiş kompleks dövlət siyasəti tələb edir. Prioritet artıq mənimsənilmiş ərazilərdə əhalinin layiqli yaşayış şəraitinin təmin edilməsi və mövcud şəhər mühitinin yaxşılaşdırılması olmalıdır", - o deyib.