Bosniya və Herseqovinada minatəmizləmə üzrə beşillik plan hazırlanıb

Bosniya və Herseqovinada minatəmizləmə sahəsində beş il üçün nəzərdə tutulmuş fəaliyyət planı hazırlanıb.

"Report" xəbər verir ki, bu barədə Bosniya və Herseqovina Minatəmizləmə Mərkəzinin nümayəndəsi Tarik Serak Bakıda keçirilən beynəlxalq konfransda bildirib.

Onun sözlərinə görə, ölkənin minalarla çirklənməsi 1992–1995-ci illərdəki müharibənin birbaşa nəticəsidir.

"Ölkədə beş ilə qədər olan dövr üçün nəzərdə tutulmuş və ərazilərin minalardan daha da təmizlənməsi üzrə konkret tapşırıqları nəzərdə tutan fəaliyyət planı hazırlanıb", - o qeyd edib.

Serak bildirib ki, 1996-cı ildə aparılmış ilkin qiymətləndirmə təxminən 4,2 min kv. km ərazinin çirkləndiyini göstərib.

Onun sözlərinə görə, 2025-ci ilə qədər bu ərazinin 80%-dən çoxunu təmizləmək mümkün olub, lakin problem hələ də ciddidir.

O, həmçinin bildirib ki, Bosniya və Herseqovinada mina insidentləri nəticəsində 1 800-dən çox insan həlak olub və ya yaralanıb.

"Münaqişədən sonrakı ilk beş ildə bu cür halların xüsusilə böyük sayı qeydə alınmışdı. Son illərdə vəziyyət əhəmiyyətli dərəcədə yaxşılaşıb: bəzi illərdə heç bir insident qeydə alınmayıb, digərlərində isə tək-tək hallar qeydə alınıb", - o qeyd edib.

Serak beynəlxalq əməkdaşlığın, həmçinin ABŞ, Avropa İttifaqı və digər dövlətlərin dəstəyinin vacibliyini vurğulayıb.

Onun sözlərinə görə, əsas istiqamətlərdən biri yerli infrastrukturun inkişafı və onun maliyyələşdirilməsinin təmin edilməsidir.

Serakın sözlərinə görə, yeni insidentlərin qarşısının alınmasında əhalinin məlumatlandırılması və mütəxəssislərin hazırlanması mühüm rol oynayır.

O, həmçinin minatəmizləmə ilə məşğul olan ölkələrin institusional və kadr potensialının gücləndirilməsinin zəruriliyini vurğulayıb.