Abbas Abbasov: BTQ və Beynəlxalq Zikh Federasiyası əməkdaşlığa dair memorandum imzalayacaq

Bakı Təşəbbüs Qrupu (BTQ) və Beynəlxalq Zikh Federasiyası tərəflər arasında akademik əməkdaşlığı tənzimləyəcək əməkdaşlıq memorandumu imzalayacaqlar.

"Report" xəbər verir ki, bu barədə BTQ-nin icraçı direktoru Abbas Abbasov jurnalistlərə bildirib.

"Biz (BTQ - red.) bu memorandum da daxil olmaqla institusional və sənədlə təsbit edilmiş mexanizmlər vasitəsilə etnik azlıqların hüquqlarının müdafiəsini gücləndirmək qərarına gəldik", - o qeyd edib.

A.Abbasov xatırladıb ki, təşkilat 2025-ci ildən zikh icmasının nümayəndələri ilə əməkdaşlığa başlayıb:

"2026-cı ildə dalit icmasının nümayəndələri ilə ilk əlaqələr qurulub və ilkin danışıqlar aparılıb. Biz gələn ay uzun illər ərzində Hindistan hökumətinin repressiya və ayrı-seçkiliyi ilə üzləşən dalitlərlə birgə layihələri açıq şəkildə elan etməyi planlaşdırırıq. Onların sayı artıq təxminən 320 milyon nəfər təşkil edir, lakin ayrı-seçkilik davam edir".