Azərbaycan Respublikasının Təhlükəsizlik Şurası — Azərbaycan Respublikasının Konstitusiyasına uyğun olaraq Prezidentin yanında fəaliyyət göstərən, dövlət təhlükəsizliyinin təmin edilməsi sahəsində mühüm qərarların hazırlanmasını və icrasını həyata keçirən ali məşvərətçi dövlət qurumudur. Şura ölkənin daxili və xarici siyasətinin strateji istiqamətlərini, milli maraqların qorunmasını, dövlətin suverenliyinin, ərazi bütövlüyünün və konstitusiya quruluşunun müdafiəsini təmin edən qərarların qəbul edilməsində mərkəzi idarəetmə platforması rolunu oynayır. Təhlükəsizlik Şurasına Azərbaycan Respublikasının Prezidenti — Müzəffər Ali Baş Komandan rəhbərlik edir.
Təhlükəsizlik Şurasının fəaliyyət dairəsi milli təhlükəsizlik konsepsiyasının formalaşdırılması, hərbi doktrinanın tətbiqi, xarici təhdidlərin dəf edilməsi, fövqəladə hallara operativ reaksiya verilməsi, habelə iqtisadi, ərzaq, kiber və informasiya təhlükəsizliyi məsələlərini əhatə edir. Şuranın tərkibinə dövlətin əsas icraedici, hüquq-mühafizə, hərbi və diplomatik strukturlarının rəhbərləri daxildir. Ölkə üçün taleyüklü, strateji və böhranlı vəziyyətlərdə keçirilən operativ iclaslarda milli təhlükəsizliyin təmin olunması ilə bağlı operativ tapşırıqlar verilir və mühüm qərarlar qəbul edilir.
Azərbaycanın müasir tarixində, xüsusilə 44 günlük Vətən müharibəsi və post-konflikt dövründə Təhlükəsizlik Şurası hərbi-siyasi müstəvidə strateji addımların atılmasında həlledici rol oynamışdır. İşğaldan azad edilmiş ərazilərdə təhlükəsizliyin tam təmin olunması, sərhəd-mühafizə infrastrukturlarının qurulması, minatəmizləmə prosesinin koordinasiyası və regional sabitlıq təşəbbüslərinin formalaşdırılması Şuranın prioritet fəaliyyət istiqamətlərindəndir.
Bu tematik bölmədə Azərbaycan Respublikası Təhlükəsizlik Şurasının keçirdiyi iclaslara, dövlət başçısının Şura çərçivəsində verdiyi bəyanatlara və tapşırıqlara, milli təhlükəsizlik, hərbi quruculuq və regional təhlükəsizlik sahəsində qəbul edilən strateji qərarlara dair aktual xəbərlər və rəsmi məlumatlar toplanmışdır.
Bakı 21° C
