“Suraxanı Maşınqayırma Zavodu”nun xalis mənfəəti 16 % artıb

“Suraxanı Maşınqayırma Zavodu” ASC 2024-cü ili 510 min manat xalis mənfəətlə başa vurub.

“Report” səhmdar cəmiyyətinin maliyyə hesabatına istinadən xəbər verir ki, bu, 2023-cü illə müqayisədə 15,9 % çoxdur.

Ötən il “Suraxanı Maşınqayırma Zavodu”nun vergiyəqədərki mənfəəti 638 min manat (əvvəlki ilə nisbətən 16 % çox), mənfəət vergisi ödəmələri isə 128 min manat (16,4 % çox) təşkil edib.

Bu il yanvarın 1-nə “Suraxanı Maşınqayırma Zavodu”nun akitvləri 10,587 milyon manat olub ki, bu da illik müqayisədə 1,8 % çoxdur. Hesabat dövründə şirkətin öhdəlikləri 3,8 % azalaraq 4,906 milyon manata düşüb, balans kapitalı isə 7,2 % artaraq 5,681 milyon manata çatıb.

Xatırladaq ki, Suraxanı Maşınqayırma Zavodu 1991-ci ildən fəaliyyət göstərir. Onun nizamnamə kapitalı 4,745 milyon manatdır. Zavod neft-mədən avadanlıqlarının istehsalı üzrə ixtisaslaşıb.