Brüsseldə Aİ və Qazaxıstan arasında sazişlər paketi imzalanıb

Avropa İttifaqı (Aİ) və Qazaxıstan iyunun 23-də Qazaxıstan Prezidenti Kasım-Jomart Tokayevin Brüsselə səfəri çərçivəsində nəqliyyat, infrastruktur, sənaye və aviasiya sahələrində əməkdaşlığa dair sənədlər paketi imzalayıblar.

"Report"un Avropa bürosu xəbər verir ki, imzalanma mərasimi Aİ rəhbərliyinin və Qazaxıstan Prezidentinin iştirakı ilə keçirilib.

İmzalanmış sənədlər arasında Aİ və Qazaxıstan arasında hava əlaqəsi haqqında saziş, Orta dəhliz çərçivəsində nəqliyyat infrastrukturunun modernləşdirilməsi üzrə kredit sazişi, Avropa Yenidənqurma və İnkişaf Bankı ilə əməkdaşlıq haqqında iki memorandum, eləcə də Qazaxıstanın "Air Astana" aviaşirkətinə "Airbus" təyyarələrinin tədarükünə dair kommersiya müqaviləsi yer alır.

Sənədlərin imzalanması Aİ və Qazaxıstan arasında iqtisadi, nəqliyyat və investisiya əməkdaşlığının daha da möhkəmləndirilməsini əks etdirir.