Astanada Türk Ticarət və Sənaye Palataları Birliyinin inkişafı müzakirə olunur

Astanada Türk Ticarət və Sənaye Palataları Birliyi (TCCI) rəhbərlərinin növbədənkənar iclası keçirilir.

"Report"un yerli bürosu xəbər verir ki, bu il İttifaqda sədrliyi Qazaxıstan həyata keçirir.

İclasda TCCI-yə üzv ölkələrin ticarət və sənaye palatalarının rəhbərləri, dövlət orqanlarının, Türk Dövlətləri Təşkilatının (TDT) və Türk İnvestisiya Fondunun nümayəndələri iştirak edirlər.

İştirakçılar Birliyin əvvəllər qəbul edilmiş qərarlarının icrasını, eləcə də TDT dövlət başçılarının qarşıdan gələn Sammitinə təkliflərin hazırlanmasını müzakirə edirlər.

Gündəliyə həmçinin TCCI-nin institusional inkişafı, vahid investisiya portfelinin formalaşdırılması və türk ölkələrinin biznes nümayəndələri arasında birbaşa qarşılıqlı əlaqələrin genişləndirilməsinə dair məsələlər daxil edilib.

Ümumi elektron ticarət və ixrac platformasının yaradılmasına, eləcə də təşkilata üzv ölkələrin sahibkarları arasında əlaqələri sadələşdirməli olan rəqəmsal alətlərin tətbiqinə xüsusi diqqət yetirilir.