Azərbaycanda pul kütləsinin artması valyuta vəsaitlərinin bahalaşması ilə bağlıdır

Bakı. 16 may. REPORT.AZ/ Azərbaycanda geniş mənada pul kütləsinin həcmi 2016-cı il aprel ayının 1-nə 20 635,1 mln. manat təşkil edib. "Report"un Azərbaycan Mərkəzi Bankına (AMB) istinadən verdiyi xəbərə görə, geniş mənada pul kütləsinin həcmi martın 1-nə nisbətən 1 036,3 mln. manat və ya 5,29%, ötən ilin analoji dövrü ilə müqayisədə isə 1 127,7 mln. manat və ya 5,78% artıb.

Manatla geniş mənada pul kütləsinin həcmi aprelin 1-nə 8 943 mln. manat təşkil edib. Bu, martın 1-nə olan analoji göstəricidən 256,6 mln. manat və ya 2,95% çoxdur, keçən ilin analoji dövrü ilə müqayisədə isə 3 550,1 mln. manat və ya 28,4% azdır. Qeyd edək ki, manatla geniş pul kütləsinin həcmi ən maksimal səviyyəsinə 2014-cü ilin noyabrında çatıb və 17 525,2 mln. manat təşkil edib. Hazırda isə bu göstərici tarixi maksimal səviyyədən 8 582,2 mln. manat və ya 49% aşağıdır.

"Report"un analitik qrupu qeyd edir ki, geniş mənada pul kütləsinin mart ayı ərzində artmasına səbəb dolların məzənnəsinin yüksəlməsi zamanı xarici valyutada olan vəsaitlərin manata ekvivalentində yüksəlməsi amili olub.