ABŞ-da inflyasiyanın sürətlənməsi istiqraz faizlərini artırıb

Bakı. 15 fevral. REPORT.AZ/ ABŞ-da istehlakçı qiymətlərinin baza indeksinin yanvar ayında 0,3%, illik müqayisədə isə 1,8% artması 10 illik dövlət istiqrazlarının gəlirliliyinin yenidəın yüksəlməsinə səbəb olub. Qeyd edək ki, analitiklər ABŞ-da aylıq baza inflyasiyanın 0,2%, illik baza inflyasiyanın isə 1,7% təşkil edəcəyini proqnozlaşdırırdılar.

"Report" xəbər verir ki, baza inflyasiyanın müvafiq gözləntiləri üstələməsi nəticəsində hazırda ABŞ-ın 10 illik istiqrazlarının faiz dərəcəsi 2,93%-ə yüksəlib və son 4 ilin maksimal səviyyəsində qərarlaşıb. 10 illik dövlət istiqrazlarının gəlirliliyinin artmasına səbəb kimi FED-in uçot dərəcəsini daha sürətlə artırması ehtimalları qeyd olunur. 

"Report"un analitik qrupu bildirir ki, qısa müddət ərzində istiqrazların gəlirliliyi 3% səviyyəsini ötə bilər: "Bu da öz növbəsində fond bazarlarında satışa səbəb olacaq. Lakin dalğalanma qısamüddətli olacaq və fond birjalarında vəziyyət sabitləşəcək. Fond birjalarında azalma trendi, dolların bahalaşması, xammalın ucuzlaşması prosesinin 2018-ci ilin sonu-2019-cu ilin əvvəlindən başlanması ehtimal edilir".