Güclü qar Cəlilabad və Biləsuvarda nəqliyyatın hərəkətində problemlər yaradıb 

Güclü qar və çovğun Cəlilabad rayonunda nəqliyyatın hərəkətində problemlər yaradıb.

"Report"un Muğan bürosunun məlumatına görə, yanvarın 13-ü günorta saatlarından yağmağa başlayan qar nəticəsində Cəlilabad şəhəri ərazisində və kəndlərdə avtomobil yollarında nəqliyyatın hərəkəti çətinləşib. Rayonun bəzi yerlərində qarın hündürlüyü 50 sm-i keçib.

Analoji hava şəraiti Biləsuvar rayonunda da müşahidə olunur. Belə ki, rayon mərkəzində və kəndlərdə avtomobil yollarında nəqliyyatın hərəkəti çətinləşib. Elektrik enerjisinin verlişində bəzi ərazilərdə fasilələr yaranıb.

Hazırda hər iki rayonda mütəmadi olaraq müvafiq orqanlar tərəfindən yollar qar örtüyündən təmizlənir. Bölgədə qar yağışı davam edir.