Federico Poitier: Bəzi şəhərlərdə əlilliyi olan şəxslərin təşkilatları idarəetmədə iştirak edə bilmir

Bəzi şəhərlərdə əlilliyi olan şəxslərin təşkilatları idarəetmədə kifayət qədər iştirak edə bilmir.

"Report" xəbər verir ki, bunu Birləşmiş Şəhərlər və Yerli Hakimiyyətlər Təşkilatının (UCLG) əlçatanlıq siyasəti üzrə eksperti Federico Batista Poitier Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Əlilliyi olan şəxslərin hüquqları üzrə Dəyirmi Masa"da çıxışı zamanı deyib.

Onun sözlərinə görə, onların qərarvermə prosesinə cəlbi üzərində işlənilir.

F.B.Poitier "Cities for All" qlobal kampaniyasının şəhərlərdə inklüzivlik və əlçatanlıq siyasətinin inkişafında mühüm rol oynadığını qeyd edərək hazırda Almaniyanın Federal İqtisadi Əməkdaşlıq və İnkişaf Nazirliyinin dəstəyi ilə yerli inklüzivlik gündəliyi üzrə universal təlimatlar hazırlandığını diqqətə çatdırıb:

"Bu sənəd yalnız bələdiyyələr tərəfindən deyil, əlilliyi olan şəxslərin təşkilatları, BMT qurumları və digər tərəfdaşlarla birlikdə hazırlanır".