Azərbaycanda 11 km dəmir yolu əsaslı təmir olunur

Bakı. 16 fevral. REPORT.AZ/ Bakı-Böyük Kəsik dəmir yolu xəttinin əsaslı təmiri çərçivəsində bu gündən 11 km dəmir yolunun təmirinə start verilib.

“Report” “Azərbaycan Dəmir Yolları” QSc-yə istinadən xəbər verir ki, Alabaşlı stansiyasında 1,7 km uzunluğunda cüt yol, Soyuq Bulaq stansiyasında 2,15 km uzunluğunda tək və cüt yollar, Gəncə-Alabaşlı mənzilində isə 7,2 km dəmir yolu təmir olunacaq.

10 gün davam edəcək təmir işlərini 5 saylı “İxtisaslaşdırılmış Dəmir Yolu Müəssisəsi” MMC-nin kollektivi həyata keçirir.

Xatırladaq ki, 14 aprel 2015-ci ildə “Azərbaycan Dəmir Yollarının Yenidən Qurulması” layihəsinin 2-ci mərhələsinin icrası məqsədilə, ADY və Çexiyanın “MORAVİA STEEL” şirkəti arasında “Bakı-Böyük Kəsik sahəsində 600 km hissənin maddi–texniki təchizatı və əsaslı təmiri” barədə ixrac müqaviləsinə əlavə saziş imzalanıb. Yeni layihənin icrasına 2015-ci ilin oktyabr ayının sonlarında başlanılıb və bu günə kimi 458 km dəmir yolu əsaslı təmir olunub.