Nazir müavini: "Azərbaycan süni intellekti şəhər və regional inkişaf çərçivələrinə inteqrasiya edir"

Azərbaycan süni intellekti şəhər və regional inkişaf çərçivələrinə sistemli şəkildə inteqrasiya edir.

"Report" xəbər verir ki, bunu rəqəmsal inkişaf və nəqliyyat nazirinin müavini Samir Məmmədov Bakıda keçirilən Ümundünya Şəhərsalma Forumunun 13-cü sessiyası (WUF13) çərçivəsində təşkil olunmuş "Şəhərlər üçün Süni İntellekt - Şəhər Planlaşdırması və Ağıllı, Davamlı İcmaların Qurulması" adlı tədbirdə bildirib.

Onun sözlərinə görə, burada məqsəd daha ağıllı, daha təhlükəsiz və daha adaptiv icma ekosistemləri qurmaqdan ibarətdir: "Milli rəqəmsal infrastrukturu uyğunlaşdıraraq, yüksək performanslı hesablama klasterlərini təşviq edərək və yerli süni intellekt kadrlarını yetişdirərək, ölkə regional texnoloji transformasiyaya rəhbərlik etmək üçün tələb olunan möhkəm məlumat arxitekturasını və tənzimləyici çərçivəni yaradır".

Nazir müavini qeyd edib ki, bu gün 95 meqabit orta sürətlə 100 % sabit genişzolaqlı əhatə Azərbaycan üçün güclü rəqəmsal infrastruktur dəstəkçisidir: "Məlumat mərkəzləri və dövlət buludları süni intellektlə işləyən şəhər xidmətlərinin tətbiqi və ağıllı icma təşəbbüslərinin irəliləməsi üçün vacib olan yüksək sürətli məlumat emalı imkanlarını təmin edir. Bu günə qədər, hətta ən ucqar kəndlərdə belə fiber-optik şəbəkələrin tam əhatəsinə sahibik. Deyərdim ki, bu, təxminən 99,5 %-dir və fiber-optik internetə çıxışı olmayan kəndlər oxşar sürət və tutum təklif edən simsiz əlaqə vasitəsilə oxşar çıxışa malikdir".