"Moody's": Qafqaz ölkələri Şərqlə Qərb arasında rəqəmsal infrastruktur formalaşdırır

Regional səviyyədə rəqəmsal infrastrukturun gücləndirilməsi və qitələrarası texnoloji təşəbbüslərin həyata keçirilməsi süni intellekt sahəsində həllərə sürətlə artan tələbat şəraitində Mərkəzi Asiya və Qafqaz regionu ölkələrinin iqtisadi transformasiyasının həlledici hərəkətverici qüvvələrinə çevriləcək.

"Report" "Moody's" beynəlxalq reytinq agentliyinin hesabatına istinadən xəbər verir ki, "Rəqəmsal İpək Yolu" proqramı Şərq-Qərb istiqamətində Avropa və Asiya qitələri arasında əlaqəni təmin edən tamamilə yeni məlumat ötürmə marşrutunun yaradılmasına yönəlib.

"Bu təşəbbüs artıq beynəlxalq ticarət və enerji resurslarının nəqli məqsədləri üçün intensiv şəkildə istifadə olunan Orta Dəhlizin rəqəmsal tərkib hissəsi kimi qəbul edilir", - analitik hesabatda qeyd olunub.

Yaradılan məlumat tranziti sisteminin əsas komponentləri bunlar olacaq: Azərbaycanı Qazaxıstanla birləşdirən Xəzər dənizindən keçən sualtı fiber-optik xətt, Avrasiya məkanını əhatə edən geniş quru fiber-optik şəbəkə, həmçinin Cənubi Qafqazın Avropanın rəqəmsal infrastrukturuna birbaşa qoşulmasını təmin edəcək Qara dənizin dibi ilə sualtı kabelin çəkilməsi layihəsi.

"Bu layihələrin həyata keçirilməsi nəinki internet bağlantısının keyfiyyətini əhəmiyyətli dərəcədə yüksəldəcək və məlumat ötürülməsi kanallarının tutumunu artıracaq, həm də transsərhəd rəqəmsal platformaların daha məhsuldar fəaliyyət göstərməsi üçün şərait yaradacaq. Bu, Asiya-Avropa marşrutu üzrə qlobal məlumat tranziti sisteminin əsas həlqələrindən biri kimi regionun rolunu nəzərəçarpacaq dərəcədə gücləndirəcək", - "Moody's" analitikləri qeyd edib.