İki Azərbaycan vətəndaşı Gürcüstanda törədilmiş qətldə şübhəli bilinir

Bakı. 2 noyabr. REPORT.AZ/ Bir həftə əvvəl özgə maşınında və üzərilərində tapança ilə saxlanılan iki kişi Gürcüstanda törədilmiş qətl hadisəsində də şübhəli bilinir.

“Report” xəbər verir ki, bu barədə Rusiya İstintaq Komitəsinin Sankt-Peterburq üzrə Baş İstintaq İdarəsinin mətbuat xidmətinin məlumatında bildirilir.

Peterburq və Moskvada yaşamış 42 yaşlı kişinin meyiti sentyabrın 11-də, Tbilisidə yerləşən restoranlardan birinin qarşısında saxlanılmış maşının içərsində aşkar edilib. O, bir neçə atəşlə qətlə yetirilib.

İstintaq Komitəsi oktyabrın 24-də Peterburqda saxlanılımış iki Azərbaycan vətəndaşı qətldə şübhəli bilir.

Onlara qarşı Rusiya Cinayət Məcəlləsinin 105-ci maddəsi üzrə (Qətl) cinayət işi qaldırılıb.

Hazırda şübhəli şəxslərin həbs olunması və onlara qarşı ittiham irəli sürülməsi məsələsinə baxılır.

Araşdırma davam etdirilir.