UEFA "Clear Line" platformasını istifadəyə verib

UEFA qaydaların tətbiqini və VAR sisteminin istifadəsini vahid formaya salmaq üçün yeni "Clear Line" platformasını istifadəyə verib.

"Report" quruma istinadən xəbər verir ki, platformada hakimlərin mübahisəli qərarları ilə bağlı 150-dən çox epizodun videosu və izahı yer alıb.

Burada qaydaların necə şərh edilməli olduğu və VAR-ın hansı hallarda baş hakimin qərarlarına müdaxilə etməli olduğu araşdırılır. Platforma yeni epizodlar ortaya çıxdıqda və ya əlavə aydınlaşdırmaya ehtiyac yarandıqda müntəzəm şəkildə yenilənəcək.

UEFA-nın VAR-a yanaşması FIFA-nın DÇ-2026-da tətbiq etdiyi qaydalardan fərqlənir. Avropa futbol qurumu videoköməkçinin hər bir mübahisəli məqamı xırdalıqlarına qədər araşdırmasının deyil, yalnız hakimin aşkar və aydın səhvi zamanı prosesə qoşulmasının tərəfdarıdır.

UEFA-nın Hakimlər Komitəsinin sədri Roberto Rozetti açıqlamasında VAR-ın matçı idarə etmədiyini, yalnız aşkar vəziyyətlər və aydın səhvlər üçün lazım olduğunu söyləyib.

UEFA-nın VAR-ın ilkin ideyasına qayıtmaq və sistemin xırda qayda pozuntularını axtarmaq üçün istifadə olunması təcrübəsindən imtina etmək niyyətində olduğu da bildirilib.