Türkiyənin iki klubu Konfrans Liqasında qrup mərhələsinə vəsiqə qazanıb

Türkiyənin iki klubu UEFA Konfrans Liqasında qrup mərhələsinə vəsiqə qazanıb.

“Report”un məlumatına görə, “Fənərbağça” və “Beşiktaş” pley-offda rəqiblərini üstələyiblər.

“Fənərbağça” öz meydanında 5:1 hesabı ilə məğlub etdiyi Niderland klubu “Tvente”yə səfərdə də qalib gəlib. Edin Cekonun yeganə qolu İstanbul nəhənginə 1:0 hesablı qələbə qazandırıb.

Ukraynanın “Dinamo” (Kiyev) klubundan səfərdə güclü olan “Beşiktaş” (3:2) Türkiyədəki cavab görüşündə də üstünlüyünü qorumağı bacarıb. “Ağ-qaralar” Vensan Abubakarın qolu sayəsində 1:0 hesablı qalibiyyətə seviniblər.

Türkiyənin digər təmsilçisi “Adana Dəmirspor” isə doğma meydanda Belçika “Genk”ini qəbub edib. Belçikadakı ilk matçda yerli komanda 2:1 hesabı ilə qalib gəlmişdisə, bu dəfə adanalılar rəqibi məğlub ediblər - 1:0. Qalibi müəyyənləşdirmək üçün penaltilər seriyasına ehtiyac duyulub. Burada daha dəqiq olan “Genk” yoluna davam edib.