"Milan" İbrahimoviçlə müqaviləni uzadıb

İtaliyanın "Milan" klubu futbolçusu Zlatan İbrahimoviçlə yeni müqavilə bağlayıb.

"Report"un "qırmızı-qaralar"ın rəsmi saytına istinadən məlumatına görə, isveçli hücumçu ilə sözləşmə 2023-cü ilin yayınadək uzadılıb. Qolçu yenə 11 nömrəli formanı geyinəcək.

Oktyabrın 3-də 41 yaşı tamamlanacaq forvard "Milan"da ilk dəfə 2010 - 2012-ci illərdə forma geyinib. O, komandaya 2020-ci ilin yanvarında qayıdıb.

İbrahimoviç klubun heyətində ümumilikdə 158 oyuna 92 qol və 35 məhsuldar ötürmə müəllifi olub. Təcrübəli hücumçu İtaliya Super Kubokunu və iki dəfə ölkə çempionluğunu əldə edib.