"Mançester Yunayted" derbidə əzmkar qələbə qazanıb

Futbol üzrə İngiltərə Premyer Liqasında XX turun daha bir oyunu keçirilib.

"Report"un məlumatına görə, turun mərkəzi matçında "Mançester Yunayted" "Mançester Siti"ni qəbul edib. "Old Trafford" stadionunda oynanılan qarşılaşmada meydan sahibləri əzmkar qələbə qazanıblar - 2:1.

Hesabı 60-cı dəqiqədə qonaqlardan Cek Qriliş açıb. 78-ci dəqiqədə Brunu Fernandeş tarazlığı bərpa edib. Cəmi 5 dəqiqə sonra isə Markus Reşford görüşdə son nöqtəni qoyub.

Bu qələbədən sonra xallarını 38-ə çatdıran "Mançester Yunayted" 3-cü pilləyə yüksəlib. 39 xalı olan "Mançester Siti" 2-ci sırada qərarlaşıb.

Qeyd edək ki, turnir cədvəlinə 44 xalla "Arsenal" başçılıq edir.