Kriştianu Ronaldu daha bir rekorda imza atıb

İngiltərənin "Mançester Yunayted" klubunun futbolçusu Kriştianu Ronaldu UEFA Çempionlar Liqasında yeni rekorda imza atıb.

"Report"un məlumatına görə, 36 yaşlı hücumçu buna İspaniyada "Vilyarreal"a 2:0 hesabı ilə qalib gəldikləri qrup mərhələsinin V tur oyununda müvəffəq olub.

78-ci dəqiqədə hesabı açan təcrübəli forvard əsas klub yarışlarından birində son 15 dəqiqədə üçüncü dəfə qələbə qolunu vurub. Bu, əlavə vaxtda bitən oyunlar istisna olmaqla, qitənin bir nömrəli klub turnirində rekorddur.

Qeyd edək ki, "Mançester Yunayted" 5 oyundan sonra F qrupunda 10 xalla liderdir. "Qırmızı şeytanlar" sona bir tur qalmış pley-offa vəsiqəni təmin edib.