İbrahim Şehiç: "Dağlıq Qarabağ sakinləri öz torpaqlarından didərgin düşməyə məcbur olublar"

Bakı. 17 may. REPORT.AZ/ "Dağlıq Qarabağ hadisələri Bosniya və Herseqovinada baş verənlər hadisələrlə eyni vaxtda başlayıb. Bu, bizim ölkənin taleyi ilə oxşardır. Demək olar ki, məqsəd və məram da eynidir. Ona görə cəbhə bölgəsinə səfər mənə maraqlı gəldi". 

Bunu "Report"a açıqlamasında Qarabağ bölgəsinə səfərdə olan "Qarabağ" klubunun və Bosniya və Herseqovina milli komandasının qapıçısı İbrahim Şehiç deyib. 30 yaşlı qolkiper Qarabağ haqqında çoxlu məlumat oxuduğunu və baş verənlərdən yetərincə məlumatlı olduğunu bildirib: "Bosniya və Herseqovina ilə Serbiyada insanlar normal sülh şəraitində yaşayırdılar. Sonradan baş verən konflikt nəticəsində döyüşlər başladı. Bosniyada 500 mindən çox insan köçkün həyatı yaşamağa məcbur oldu. Bilirəm ki, Azərbaycan da eyni problemlə üzləşib. Dağlıq Qarabağda yaşayan insanlar öz torpaqlarından didərgin olmağa məcbur olublar. 1 milyona yaxın qarabağlı öz torpaqlarını tərk etmək məcburiyyətində qalıb. Hər zaman mənim ürəyimdə arzu olub ki, cəbhə bölgəsinə gedim. Qarabağ vətəndaşlarının öz torpaqlarını müdafiə etməsi, hər zaman ümid içində yaşamaları, öz torpaqları üçün mübarizə aparmaları və insanlardakı bu ümidi yüksək dəyərləndirmişəm. Bu mənim üçün olduqca maraqlı idi".