Bir gəncin uğuru - bayraq qüruru

“Gənclər milli ruhda, vətənpərvərlik ruhunda, ənənəvi dəyərlər əsasında tərbiyə almalıdırlar. Bax, belə gənclər ölkəmizi gələcəyə inamla aparacaq. Hesab edirəm ki, bugünkü gənclərin mütləq əksəriyyəti bu meyarlara cavab verir - bilikli, savadlı, Vətənə bağlı, vətənpərvər və dünyaya açıq...” 

Azərbaycan Prezidenti İlham Əliyevin müasir gəncliyi xarakterizə edən bu sözlərində həm arzu var, həm də inam... Dövlətimizin başçısı biliyin, savadın gənclərimizin təminatlı gələcəyini müəyyənləşdirdiyini qeyd etməklə yanaşı, onların vətənpərvərliyinin də ölkəmizin müstəqilliyi üçün vacib amil olduğunu hər zaman xatırladır.

Müstəqil dövlətçiliyimizə sədaqət, onun əsas rəmzlərindən olan bayrağımıza sevgi və ehtiram xaricdə yaşayan və təhsil alan,yaxşı ailə tərbiyəsi görmüş, saf əqidəli, yüksək mənəviyyatlı gənclərimiz üçün səciyyəvi xüsusiyyətdir. Belə gənclərdən biri hazırda İngiltərədə - Kembric Ebbi Kolecində ("Abbey College Cambridge") təhsil alan 16 yaşlı Cavid Abdullayevdir. O, dünyanın 40-dan çox ölkəsindən 400-dək müdavimi olan kollecə bu il qəbul edilib. Burada universitetə hazırlığın ən yüksək standartları tətbiq olunur.

Müasir və mükəmməl tədris proqramında tələbələrin fiziki inkişafına da xüsusi yer verilir. Bu baxımdan, Cavid İngiltərəyə, necə deyərlər, tam hazırlıqlı gedib. Bakıda “Fight Club”da universal döyüş növü ilə məşğul olub, hətta yarışlarda iştirak edib, uğurlu nəticələr qazanıb. Kollecdə, təbii ki, onun idmana marağından və idmançı hazırlığından xəbərdardırlar. Məhz buna görə də Cavidə İngiltərədə çox populyar olan boks üzrə Şəhər Kubokunda qüvvəsini sınamaq tövsiyə edilib.

Hər il xeyriyyə məqsədli yarışın təşkilatçısı 1990-cı illərdə Londonda əsası qoyulmuş Ağ Yaxalıqlıların Dünya Boks Assosiasiyası (World White Collar Boxing Association - WWCBA) olub. Əslində, assosiasiyanın adı qəribə səslənir. İş ondadır ki, boksa maraq göstərən və qısa müddət ərzində bu idman növü üzrə müəyyən hazırlıq keçən hər kəs həmin yarışlarda iştirak edə bilər. “Ağyaxalıqlılar” termini də elə həmin məqamla bağlıdır. Bu termin Qərbdə əqli əməklə məşğul olan, idmanla bilavasitə əlaqəsi olmayan şəxslər haqqında işlədilir. Əsas məsələ odur ki, Ümumdünya Boks Təşkilatının (WBO) və Beynəlxalq Boks Assosiasiyasının (AIBA) mövcud qaydaları əsasında keçirilən yarışlardan çox yüksək məbləğdə gəlir bütövlüklə xeyriyyə məqsədlərinə sərf olunur.

Cavid iki şəhərdə - Londonda və Kembricdə keçirilmiş yarışların iştirakçısı olub və 70 kq çəki dərəcəsində rinqə çıxıb. Universal döyüş növü ilə məşğul olarkən əldə etdiyi boks bacarıqları ona bütün rəqiblərindən üstün olmaq və hər iki şəhərdə öz çəki dərəcəsində birinci yeri tutmaq imkanı verib. Beləliklə, Cavid Abdullayev İngiltərədə boks üzrə populyar Şəhər Kubokunda çempionluğa yüksəlmiş ilk azərbaycanlı olub. Bu, həm də təhsil aldığı ölkənin ictimai həyatında gənc soydaşımızın fəal iştirakının göstəricisi, bütün dünyada rəğbətlə qarşılanan humanizm və xeyriyyəçiliyə onun ilk töhfəsi kimi dəyərləndirilməlidir.

Layiq olduğu rəmzi mükafatı – kuboku alarkən Cavidin çiynində üçrəngli Azərbaycan bayrağı olub: Vətənə sevgi, dövlətçiliyə ehtiram əlaməti kimi...

O, çox gəncdir – hələ qarşıda xalqına, Vətəninə, dövlətinə daha böyük xidmətlər göstərmək fürsəti olacaq. Xaricdə təhsilini başa çatdırdıqdan sonra Azərbaycana dönmək, dünyanın ən nüfuzlu təhsil müəssisələrində qazandığı bilik və bacarıqları burada ölkəmizin inkişafına yönəltmək arzusundadır. Xalqımızın və dövlətimizin gələcəyi məhz belə gənclərlə bağlıdır. Onlar hər zaman bayrağımızı qürurla dalğalandıracaqlar.

Uğur olsun, Cavid!