Serbiya Azərbaycandan 35 milyon kubmetrdən çox qaz alıb

Azərbaycan bu ilin əvvəlindən Serbiyaya 35,3 milyon kubmetrdən çox təbii qaz tədarük edib.

Bu barədə “Report”a Dövlət Statistika Komitəsindən məlumat verilib.

Azərbaycan qazının Serbiyaya tədarükü 2024-cü ilin fevralında başlayıb.

Bu ilin fevral-oktyabr aylarında Serbiyaya 12 milyon 984,04 min ABŞ dolları dəyərində 35 milyon 352,33 min kubmetr qaz tədarük edilib. Serbiyaya tədarük Azərbaycanın ümumi qaz ixracının cəmi 0,2 %-ni təşkil edib.

Statistik məlumatlara görə, təkcə oktyabr ayında Azərbaycan Serbiyaya 1 milyon 369,98 min ABŞ dolları dəyərində 3 milyon 35,77 min kubmetr qaz tədarük edib.

Söhbət Azərbaycan Dövlət Gömrük Komitəsi tərəfindən rəsmiləşdirilmiş (bəyan edilmiş) həcmlərdən gedir.

Xatırladaq ki, 2023-cü ilin noyabrın 15-də Bakıda Azərbaycan Dövlət Neft Şirkəti (SOCAR) və “Srbijagas” arasında 2024-cü ildə Serbiyaya 400 milyon kubmetrə qədər qazın nəqli haqqında müqavilə bağlanıb. 2024-2026-cı illərdə Serbiya Azərbaycandan illik 400 milyon kubmetrədək qaz alacaq, 2027-ci ildən etibarən tədarükün həcminin artırılması nəzərdə tutulur.