OPEC bu il üçün Azərbaycanda maye karbohidrogen hasilatı proqnozunu azaldıb

Azərbaycanda 2023-cü ildə maye karbohidrogen hasilatının sutkada 20 min barel azalaraq orta hesabla 700 min barel səviyyəsinə çatacağı proqnozlaşdırılır.

"Report" Neft İxrac Edən Ölkələr Təşkilatının (OPEC) noyabr hesabatına istinadən xəbər verir ki, sentyabr ayında əsas neft yataqlarından hasilatın gözləniləndən aşağı olması səbəbindən bu rəqəm gündəlik 8 min barel azalma istiqamətində yenidən nəzərdən keçirilib.

“Xəzər dənizinin Azərbaycan sektorunda yerləşən “Azəri-Çıraq-Günəşli” (AÇG) neft yataqları kimi köhnə laylardakı azalmaların bu il ilk növbədə digər yataqlardakı artımla kompensasiya ediləcəyi gözlənilir.

Sentyabrda Azərbaycanda maye karbohidrogenlərin hasilatı əvvəlki ayla müqayisədə 6 min barel artıb, ötən illə müqayisədə gündəlik orta hesabla 41 min barel azalaraq 600 min barel təşkil edib. Rəsmi mənbələrə görə, xam neft hasilatı orta hesabla sutkada 504 min barel, “Şahdəniz” yatağından hasilat isə gündəlik olaraq 139 min barel təşkil edib", - məlumatda deyilir.

OPEC-in hesablamalarına görə, 2024-cü il üçün Azərbaycanın maye karbohidrogenlərin gündəlik hasilatı sabit qalaraq orta hesabla 700 min barel olacağı proqnozlaşdırılır. Artımın qismən “Şahdəniz”, “Abşeron” və “Ümid Babək” qaz-kondensat layihələri hesabına baş verəcəyi proqnozlaşdırılır.

Hesabatda qeyd olunur ki, gələn il AÇG-nin yeddinci platforması – “Azəri-Mərkəzi-Şərqi” (ACE) sayəsində Azərbaycanın AÇG neft yataqlarından hasilat da artmalıdır: "Bununla belə, ümumi azalma tempinin planlaşdırılan artımı kompensasiya edəcəyi gözlənilir".