EWRC: İyulda Azərbaycan Bolqarıstanın təbii qaza olan tələbatının 90 %-ni ödəyəcək

Bolqarıstanın kommunal xidmətlər üzrə tənzimləyici orqanı iyul ayı üçün qazın qiymətində 2,4 %-lik azalmanı təsdiqləyib.

“Report” Bolqarıstan mətbuatına istinadən xəbər verir ki, yeni qiymət nəqliyyat xərcləri, aksiz rüsumları və əlavə dəyər vergisi istisna olmaqla bir MVt/saat üçün 58,1 lev səviyyəsində müəyyənləşdirilib.

Bolqarıstanın Enerji və Su Tənzimləmə Komissiyası (EWRC) bunun ilk növbədə Azərbaycanla uzunmüddətli qaz müqaviləsi ilə bağlı olduğunu və bu müqavilənin qaz qovşaqlarındakı qiymətlərlə deyil, beynəlxalq bazarlardakı neft qiymətləri ilə əlaqəli olduğunu bildirib.

Bildirilir ki, iyulda Azərbaycan qazının ölkədə daxili istehlakın 89,6 %-ni təşkil edəcəyi proqnozlaşdırılır.

İstehlakın qalan hissəsi mayeləşdirilmiş təbii qazın (LNG) tədarükü müqaviləsi ilə dövlətə məxsus qaz şirkəti “Bulgargaz” və ölkənin Çirəndəki anbarından çəkilən qaz vasitəsilə təmin edilir.

Xatırladaq ki, Azərbaycan qazının bu ölkəyə tədarükünə Yunanıstan-Bolqarıstan İnterkonnektoru (IGB) vasitəsilə 2022-ci ilin oktyabrın 1-dən başlanılıb. “Bulgargaz EAD” dövlət şirkəti “Şahdəniz-2” qaz-kondensat yatağından ildə 1 milyard kubmetr təbii qaz almaq üçün "Şahdəniz" konsorsiumu ilə müqavilə imzalayıb.

Ümumi uzunluğu 182 km, illik ötürmə qabiliyyəti 3-5 milyard kubmetr həcmində olan IGB-nin 150 km-lik hissəsi Bolqarıstan ərazisinə düşür.

IGB layihəsi 2011-ci ildə Bolqarıstanda qeydiyyatdan keçmiş “ICGB AD” investisiya şirkəti tərəfindən Bolqarıstanın Enerji Holdinqi (50 %) və Yunanıstanın “IGI Poseidon” (50 %) şirkətinin səhmdarları ilə birlikdə reallaşdırılır.